Leit á asatru.is:

Athafnir
Félagsstarf
Ásatrú
Kvæði og fræði
Myndir
Horfa/hlusta

Lögrétta 28. maí 2015

Lögréttufundur 28. maí 2015
Um fundarritun sá Haukur Bragason
 
Mættir: Kári, Silke, Sigurboði, Bergrós, Hilmar, Alda og Haukur
Í gegnum fjarfundarbúnað: Lenka, Jóhanna og síðar Urður.
Á hluta fundar: Magnús Jensson og Kristinn Jósep Gíslason
 
Fundur settur kl. 18:15
 
1. Hof. Lögsögumaður og allsherjargoði höfðu farið yfir þau tilboð sem bárust í gerð byggingarteikninga, þar með talið burðarvirki, pípulagnir, raflagnir, brunavarnir og allt sem bygginguna varðar á meðan hún er á byggingarstigi. Allsherjargoði undirritaði tilboð lægstbjóðanda með fyrirvara um samþykki lögréttu, var það samþykki veitt einróma á fundinum.
 
2. Lögrétta áréttar að Kristinn Jósep Gíslason sé verkefnastjóri hofbyggingarinnar fyrir hönd Ásatrúarfélagsins. Stýriverktaki er Spöng ehf. samkvæmt samningi undirrituðum 13. febrúar 2015. Kristinn sér um yfirferð og áritun reikninga sem lúta að verkefninu fyrir hönd Ásatrúarfélagsins. Einnig er um að ræða óundirritaða samninga við Magnús Jensson arkitekt, og Landmótun ehf. sem áður hefur unnið deiliskipulag fyrir félagið. Lögrétta lagði til og samþykkti að samningar yrðu gerðir við KJG ráðgjöf ehf. svo öllum formsatriðum verði fullnægt.
 
3. Fjárhagsstaða rædd. Kostnaður við verkið er sem stendur undir kostnaðarviðmiðum sem lögð voru til grundvallar í upphafi.
 
4. Staða hofsjóðs. Ekkert hefur verið hreyft við honum enn sem komið er.
 
5. Næstu verkefni. Magnús og Kristinn fóru yfir málin og kynntu lögréttu nýjustu fréttir. Smávægilegar breytingar á teikningum Magnúsar voru samþykktar. Magnús lagði síðastliðinn þriðjudag inn umsókn um byggingarleyfi til embættis byggingarfulltrúa í Reykjavík.
 
Þegar hér var komið viku Magnús og Kristinn af fundi, og Urður kom til fundar gegnum fjarfundarbúnað.
 
6. Þingblót. Samþykkt að hafa þingblót með hefðbundnu sniði og leita eftir skemmtiatriðum á góðum kjörum.
 
7. Minnisvarði. Minnt var á fyrri áætlanir um að reisa minnisvarða að Draghálsi um Sveinbjörn Beinteinsson. Ákveðið að grennslast fyrir um stöðu mála.
 
8. Fundargerð lesin upp og samþykkt.
 
Fundi slitið kl. 20:50.