Fréttir

Um er að ræða 50% starf við almenn skrifstofustörf og þjónustu við félaga.  Starfið býður upp á fjölbreytileika, mikil mannleg samskipti og möguleika á hærra starfshlutfalli síðar.

Vinnutími er frá kl. 12:30-17:00 þriðjudaga til föstudaga, eða eftir samkomulagi.
Helstu verkefni:
•    umsjón með bókhaldi félagsins.

•    almenn umsjón með rekstri skrifstofu; s.s. útleigu á húsnæði, birgðahaldi og þrifum.

•    símsvörun, móttaka og umsjón með tölvupósti og samfélagsmiðlum félagsins

•    vera lögréttu og goðum til aðstoðar við innkaup fyrir blót og aðra viðburði. 

Menntunar- og hæfniskröfur:
•    þekking á almennu tölvubókhaldi.

•    gott vald á íslensku og ensku (talað og skrifað).

•    reynsla í notkun samfélagsmiðla.

•    skipulögð vinnubrögð og sjálfstæðni.

•    viðkomandi þarf að hafa ánægju af mannlegum samskiptum.

Umsóknarfrestur rennur út 8. september
Sækja skal um starfið hér: https://alfred.is/starf/13064?cat=0

Siðfræðsla fyrir þá sem hyggja á siðfestuathöfn á næsta ári hefst laugardaginn 30. september. Fræðslan fer fram í Síðumúla 15 og hefst klukkan 12:00.
Vinsamlega skráið ykkur á skrifstofu: asatru@asatru.is eða johanna@asatru.is.

Skrifstofan opin eftir sumarleyfi frá 13:30 til 16:00, virka daga. Alltaf heitt á könnunni!

Árlegt Njarðarblót í Suðurlandsgoðorði verður haldið á Fossflöt í Hveragerði sunnudaginn 30. júlí kl. 13:00. Gengið er inn í lystigarðinn á horni Breiðamerkur og Skólamerkur. Eftir athöfn eru blótsgestir boðnir í kaffi og með því á veitingastaðnum Varmá. Haukur Bragason helgar blótið.

Gróðurblót í Baldurslundi í Heiðmörk verður haldið sunnudaginn 16. júlí nk. Að venju komum við saman og gróðursetjum í reit Ásatrúarfélagsins við Þingnes í Heiðmörk.
Áhugasamir félagar hafa á umliðnum árum komið saman og gróðursett í reit félagsins undir styrkri stjórn Egils Baldurssonar og við erum farin að sjá árangur erfiðisins.
Þingnes við Elliðavatn var fyrsti helgistaður Íslands og þar helgaði Þorsteinn Ingólfsson, fyrsti allsherjargoðinn,  þing á þessum fagra stað.
Mæting verður kl. 15 og í framhaldi af gróðursetningu munum við eiga góða stund með helgihaldi, kveðskap, tónlist, mat og drykk.
Við fáum góða gesti í heimsókn og stemmingin verður einstök sem endranær.

Skrifstofa Ásatrúarfélagsins verður lokuð í júlí. Opnum aftur 1. ágúst. Opnu húsin á laugardögum verða á sínum stað frá kl. 14:00 – 16:00 eins og áður. Alltaf er hægt að ná í goðana en upplýsingar um þá má finna á heimasíðunni asatru.is.

Gróðurblót verður haldið við Þingnes þann 16. júlí á reitnum okkar í Heiðmörk. Nánar auglýst síðar.

Þingblót verður haldið fimmtudaginn 22. júní 2017. Blótið verður helgað stundvíslega  kl. 20:00 við Lögberg. Eftir helgistundina verður gengið niður að tjaldborg á Völlunum þar sem blótveislan fer fram. Grill verða á staðnum, pylsur handa börnum og ýmislegt sér til gamans gert. Allir velkomnir.

Notkun rúnaleturs virðist í hugum flestra Íslendinga einskorðast við ristur með eldri eða yngri fúþark-stafrófi á minningarsteinum eða rúnasteinum í Skandinavíu, sem reistir eru í minningu einhvers, eða þá við galdratákn og kukl í íslenskum handritum. Þessi hátíðlega notkun á rúnum er þó ekki einkennandi fyrir notkun rúnaleturs eða rúnahefðina á Íslandi – rúnir virðast hafa verið mikilvægur hluti af hversdagslegu lífi manna hér á öldum áður. Rúnir voru notaðar alla jafna fram til 1900 á Íslandi, við hin ýmsu tilefni og lifðu með þjóðinni þrátt fyrir mótbárur kirkjunnar. Þær voru ódrepandi þáttur í íslenskri menningu, en svo virðist sem alger viðsnúningur hafi orðið í þeim efnum. Íslendingar þekkja ekki lengur sína rúnahefð, hafa glatað henni og gleymt. Hér verður því farið yfir sögu hinnar íslensku rúnahefðar, varðveittar rúnaristur á Íslandi og helstu tegundir ristna hérlendis.

Sýning Önnu Leifar Elídóttur, Ömmurnar verður opnuð í salnum í Síðumúla 15, laugardaginn 6. maí á opna húsinu, kl. 14:30 til 16:30. Léttar veitingar verða í boði.
Ömmurnar eru myndverk sem Anna Leif málaði af nokkrum formæðrum sínum sem fæddar voru á tímabilinu 1874-1923. Með myndunum fylgir saga hverrar þessarra kvenna, en þær áttu mjög ólíka daga um ævina.
Anna Leif útskrifaðist úr fornámi til myndlistar frá Myndlistaskólanum í Reykjavík. Hún lauk BA námi í myndlist frá Listaháskóla Íslands árið 2005 og diplóma til kennsluréttinda á grunn- og framhaldsskólastigi þaðan árið 2007. Anna Leif lauk námi í menningarstjórnun við Háskólann á Bifröst og starfar nú á Þjóðminjasafninu.

Ömmurnar er verkefni sem Anna Leif hefur verið lengi með í huga enda ættfræði henni, sem og flestum Íslendingum hugleikin. Anna Leif er útskrifuð frá Listaháskóla Íslands árið 2005 með BA í myndlist. Hún hefur sýnt á fjölda samsýninga en síðasta einkasýning hennar var á Vökudögum árið 2013 í Klukkuturninum að Görðum, Akranesi.

Pétur Halldórsson flytur fyrirlestur sinn, Stærð veraldar, á opna húsinu laugardaginn 22. apríl, kl. 14:30 í Síðumúla 15.
Hin forna trú byggðist á hringrás lífs og dauða, tímatali, tölvísi, endurtekningu, hugmyndafræði miðju, jarðartrú og landmælingu. Helgistaðir voru tengdir landinu og náttúran lék megin hlutverk í helgisiðum. Allir eru velkomnir.