Sigurblót Ásatrúarmanna verður haldið við Sílavík á sumardaginn fyrsta, fimmtudaginn 20. apríl. Sigurður Mar Svínfellingagoði helgar blótið kl. 17:00. Sumardagurinn fyrsti er hinn forni þjóðhátíðardagur Íslendinga og um aldir hefur tíðkast að gefa börnum sumargjafir. Því fá öll börn sem mæta litla sumargjöf. Á eftir verða grilluð Iðunnarepli og goðapylsurnar verða á sínum stað. Allir eru hjartanlega velkomnir.
Vegna viðgerða á húsnæði Ásatrúarfélagsins fellur opna húsið niður laugardaginn 8. apríl og Barnagaman sunnudaginn 9. apríl.
Vorjafndægrablót á Vesturlandi verður haldið sunnudaginn 19. mars kl 16:00 í Einkunnum sem er fólkvangur og útivistarsvæði skammt ofan Borgarness.
Blótið verður helgað vönum og vættum vorsins og goðmögnum gróandans. Lyftum horni og fögnum lengri sólargangi og komandi vori! Allir velkomnir.
Til Einkunna liggur 3,5 km vegur af þjóðvegi nr 1 við hesthúsahverfið aðeins fyrir ofan Borgarnes.
Upplýsingar hjá Jónínu K. Berg Þórsnessgoða í 865-2581
Jöklar heimsins hafa bráðnað og undan þeim skriðu allir óvættirnir úr þjóðsögunum. Eftirlifendur kúldrast á eyjum í sífelldum ótta við að verða étin. Breiðholtseyja er höfuðborg Fróneyja, þar má finna einu stofnanirnar frá gamla þjóðveldinu. KGRR, Kukl og galdra rannsóknarsetur ríkissins, var stofnað til að bregðast við þessari ævafornu, en þó nýju, vá þegar að flæddi yfir bakka Íslands. Ævintýrið hefst þegar Ormhildur, starfsmaður KGRR, finnur galdraseið sem að getur fryst jöklana á ný og frelsað heiminn úr klóm næturskrímsla. Eini hængurinn er að seiðurinn þarf að vera framkallaður á tindi Heklu, langt í burtu, yfir auðn og haf.
Opinn lögréttufundur verður laugardaginn 4. mars kl. 14:00. Allir félagsmenn eru hvattir til að mæta og taka þátt. Kaffi og meðlæti á boðstólum. Allir velkomnir.
Fyrirlestur um hofið verður haldinn laugardaginn 18. febrúar kl. 14:30 í Síðumúla 15. Magnús Jensson arkitekt rekur þann hluta hönnunarferlisins sem lýtur að helgidómi hofsins. Kaffi og meðlæti á boðstólum. Hvetjum alla til að fjölmenna!
Opnun myndlistarsýningarinnar Ár og kýr
fimmtudaginn 2. febrúar
Myndlistarmaðurinn og kúabóndinn Jón Eiríksson á Búrfelli málaði eina vatnslitamynd af kúm hvern dag árið 2003. Verkin hafa aldrei verið sýnd áður, en þau fylgja árstíðum í náttúru Íslands og vitna um húmor og sterka ást á landinu.
Hluti myndanna prýðir vegg í sal Ásatrúarfélagsins í Síðumúla 15 en hluti þeirra er til sýnis í möppu í salnum.
Einnig verður bókin Ár og kýr með öllum 365 kúamyndum Jóns til sölu á skrifstofu félagsins.
Sýningin verður formlega opnuð fimmtudaginn 2. febrúar kl. 17:00 og mun væntanlega standa fram á vormánuði.
Allir velkomnir meðan húsrúm leyfir
Næsta laugardag, 4. febrúar kl. 14:30, mun Terry Gunnell, prófessor í þjóðfræði við Háskóla Íslands flytja fyrirlesturinn Hve hár var hinn hávi? Staða Óðins í íslensku samfélagi fyrir kristnitöku. Fyrirlesturinn byggir á hugmyndum Gabriels Turville-Petre og annara, og styrkir þær kenningar, að þrátt fyrir það hlutverk sem Snorri fær Óðni í verkum á borð við Snorra-Eddu og Ynglingasögu, þá hafi guðinn Óðinn verið tiltölulega óþekktur á Íslandi fyrir kristnitöku (utan skáldastéttar). Þessar hugmyndir byggja á þeirri staðreynd að guðinn er harla nefndur, hvorki í Landnámubók né Íslendingasögunum, sem leggja þó áherslu á guði eins og Þór og Freyr. Fjarvera hans endurspeglast líka í örnefnum og eiginnöfnum og svo virðist sem það sama sé uppi á teningnum í Noregi. Höfundur leggur til að þessi fjarvera krefjist endurskoðunar fjölmargra atriði með tilliti til fornnorrænna trúarbragðafræða. Til að byrja með, hugmyndin um sameiginlega goðafræði, trúariðkun og stöðu goðanna sem sameiginlega á Norðurlöndum á járnöld og miðöldum. Í öðru lagi, hugmyndin um að flestir hafi séð Óðinn sem hinn ráðandi guð. Enn fremur bendir höfundur á, líkt og aðrir hafa gert, að þessi atriði bendi til þess að fara þurfi varlega í að treysta Snorra-Eddu þar sem allt bendir til þess að Snorri hafi annað hvort litið hjá pg breytt þeim upplýsingum sem fyrir lágu um Óðinn, eða þá málað mynd af honum sem hentaði ákveðnum lesskilning. Að lokum stingur höfundum upp á að þessar vísbendingar gagnist okkur við að skilja varðveislu Eddukvæða og uppruna þeirra, þar sem mörg hver birta mynd sem ekki samræmist þeim myndum sem birtast í sögunum. Það gæti bent til uppruna þeirra utan Íslands og að skáldin hérlendis hafi varðveitt þau sem hluta af sinni menningarlegu þjálfun. (Kynning þýdd úr ensku með fyrirvara um villur – fyrirlesturinn verður fluttur á íslensku).
Fyrsti fyrirlestur á nýju ári verður laugardaginn 28. janúar kl. 14:30
í Síðumúla 15, þegar Guðrún Ingólfs flytur erindið "Bara húsmóðir? Rýnt í bækur kvenna frá fyrri tíð".
Íslenskar konur áttu ekki kost á skólagöngu fyrr en seint á 19. öld og opinber embætti stóðu þeim ekki til boða. Þær urðu annaðhvort húsmæður eða vinnukonur. Til að varpa ljósi á eitt meginhlutverk kvenna á fyrri tíð verður kafað ofan í bók úr eigu eyfirskrar húsmóður á 18. öld. Hvað segir bókin um menntun hennar, menningarlegan bakgrunn og hlutverk í veröldinni?
Getur hent að viðhorf okkar nútímakvenna hafi villt okkur sýn á formæður okkar og um leið okkur sjálfar?
Guðrún Ingólfsdóttir er sjálfstætt starfandi fræðimaður á Stofnun Árna Magnússonar í íslenskum fræðum.
Allir eru velkomnir.
Þorrablót Ásatrúarfélagsins verður haldið á bóndadaginn 20. janúar í sal Flugvirkjafélagsins Borgartúni 22. Veitingar verða í boði frá Soho og happdrætti að venju. Sigurboði og Kári skemmta gestum og Teresa les smásögu. Svo er aldrei að vita nema slegið verði upp í hringdans!
Húsið opnar kl 19:30 og blót helgað kl. 20:00. Blóttollur er kr. 6.500. Hægt er að koma á skrifstofuna sem er opin milli 13:30 og 16:00 og kaupa miða, hringja í síma 561-8633 eða senda póst á asatru@asatru.is í síðasta lagi fyrir miðvikudaginn 18. janúar.
ATHUGIÐ: Ekki er hægt að kaupa miða við innganginn og ekki verður bókað inn á blótið eftir 18. janúar.