Vegna komandi Allsherjarþings, þá er hér minnt á að samkvæmt 37. grein starfsreglna Ásatrúarfélags þarf að skila tilkynningu að tillögum til lagabreytinga með minnst sex vikna fyrirvara, og rennur sá frestur út mánudaginn 23. september næstkomandi. Hægt er að skila tillögum á netföngin skrifstofa@asatru.is og logsogumadur@asatru.is. Koma þarf fram í tilkynningu hvaða lagagreinum verður lagt til að breyta og vera skýrt í hverju tillagan er fólgin, til dæmis með tillögu að orðalagi. Endanlegt orðalag þarf að liggja fyrir þegar boðað er til allsherjarþings með tveggja vikna fyrirvara, en samkvæmt 37. greininni þarf þá að kynna tillöguna á samfélagsmiðlum félagsins.
Við minnum einnig á að á síðasta allsherjarþingi voru samþykktar breytingar á 28. grein starfsreglna félagsins. Samkvæmt núgildandi lögum þarf að skila inn framboðum til lögréttu minnst viku fyrir allsherjarþing, og þriggja manna kjörnefnd hefur nú tekið til starfa og getur tekið við framboðum. Í kjörnefnd eru Jökull Tandri Ámundason, Dalverjagoði, kjörinn af Lögréttu. Kjörin á síðasta Allsherjarþingi eru í kjörnefnd Alda Vala Ásdísardóttir Hvammverjagoði og Óttar Ottóson fyrrverandi lögsögumaður.
Hér eru lög félagsins.