Opið hús á morgun laugardag!
Það er kaffi á könnu og öllum frjálst að mæta í spjall í hofið okkar í Öskjuhlíð.
Húsið opnar kl. 14:00 og lokar kl. 16:00
Dagrún Ósk Jónsdóttir og Jón Jónsson þjóðfræðingar á Ströndum rifja upp næstum því gleymdar sögur um íslensku jólafólin í hofi Ásatrúarfélagsins 20. desember næstkomandi.
Flestir þekkja gamlar og ljótar sögur um Grýlu sem var hryllileg mannæta og jólasveinana sem forðum voru til vandræða hvar sem þeir komu. Sumir í fjölskyldunni eru samt að mestu gleymdir eins og fyrri eiginmenn Grýlu og jólasveinar eins og Lungnaskvettir, Flórsleikir eða Flotnös.
Sagt verður frá óhugnanlegum sögum og þjóðtrú um Grýlu og hennar hyski. Sumt af því hentar varla mjög ungum börnum eða viðkvæmum sálum en öll sem þora eru hjartanlega velkomin!
Þau feðgin gáfu einnig út bók um efnið núna fyrir jólin sem ber yfirskriftina Gömlu íslensku jólafólin: fróðleikur og ljótar sögur, og verða með hana með sér.
Húsið opnar kl 14:00 og er öllum frjálst að mæta. Best að mæta tímanlega til að fá sæti.
Ása Hlín Benediktsdóttir mætir í hofið okkar í Öskjuhlíð og kynnir bókina Hallormsstaðaskógur: söguljóð fyrir börn með upplestri en bókin sækir m.a. í norræna goðafræði.
Hver veit nema lagarfljótsormurinn verði með í för? Þá bjóðum við einnig upp á jólaföndur fyrir börnin, þar sem við málum köngla og föndrum saman, boðið verður upp á heitt kakó og piparkökur.
Aðgangur er ókeypis og öllum frjálst að mæta. Húsið opnar klukkan 14:00.
Laugardaginn 13. desember n.k. mun Stefán Pálsson sagnfræðingur og félagsmaður í Ásatrúarfélaginu halda erindi í hofinu okkar í Öskjuhlíð í tilefni útgáfu myndasögunnar Sýnir Völvunnar sem kom út á dögunum.
Myndasagan er fimmtánda og síðasta bókin í sagnaflokknum um Goðheima (danska: Valhalla) eftir Peter Madsen. Eftir langa bið er sagnaflokknum loksins lokað á íslensku. Þessar frábæru myndasögur hafa mótað hugmyndir heilu kynslóðanna um Æsi og norræna goðafræði.
Í erindinu verður fjallað um útgáfusögu þessara merkilegu dönsku myndasagna sem hófu göngu sína sem verkefni kornungra manna sem vildu búa til svar Dana við Ástríksbókunum eða Lukku-Láka en endaði í djúpri rannsókn á norrænum sagnaarfi.
Erindi Stefáns er ókeypis og opið öllum en húsið opnar kl 14:00. Það er takmarkað framboð af sætum svo best að mæta tímanlega.
Þá eru við byrjuð aftur með handverkskvöldin. Öllum er frjálst að mæta í kaffi, spjall og hannyrði í hofinu okkar í Öskjuhlíð þriðjudagskvöldið 25. nóvember í hofinu okkar í Öskjuhlíð.
Hlökkum til að sjá ykkur!
Landvættablót verða helguð í öllum landsfjórðungum 1. desember næstkomandi og hefjast þau á sama tíma eða klukkan 18:00.
—-
Dalverjagoði helgar blót í Víkurfjöru en hér má sjá nánari upplýsingar um viðburðinn:
—-
Guðlaug Elísabet Ólafsdóttir Þingskálagoði helgar blót við Óslandstjörn á Höfn í Hornafirði. Það verður boðið upp á heitt kakó og smákökur eftir blót.
—-
Landvættablót Griðungsins verður haldið í Bolungarvík við Völuspáskiltið. Boðið verður uppá heitt súkkulaði og smákökur að blóti loknu. Elfar Logi Haukadalsgoði helgar blótið.
—-
Landvættablót verður á Hamarkotstúni á Akureyri. Ragnar Elías Ólafsson Þveræingagoði helgar blótið.
—-
Landvættablótið verður á sínum stað á Þingvöllum, nánar tiltekið í Almannagjá. Boðið verður upp á heitt kakó og piparkökur eftir blót.
—-
Blótin okkar eru opin öllum.
Ætlum að hefja aftur handverkskvöldin.
Við bjóðum alla velkomna í hofið okkar í Öskjuhlíð næstkomandi þriðjudagskvöld kl 20:00.
Kaffi á könnunni þar sem við sitjum við hannyrði og spjall.
Hlökkum til að sjá ykkur.
Síðastliðinn mánudag fengum við heimsókn frá mjög áhugasömum nemendum í verkefnastjórnun við Háskólann í Reykjavík.
Þetta var liður í heimsókn þeirra til ýmissa trúfélaga.
Siðfestufræðslan hófst síðastliðinn sunnudag og mættu nemendur í hofið með foreldrum og forráðamönnum.
Við minnum á að enn er hægt að skrá nemendur í siðfestu hér:
https://docs.google.com/forms/d/e/1FAIpQLSdMYhz7jlw_7oH37xsJUaVFfhXbzKrtxLGr29lpt8agJj_P7Q/viewform
Að venju er opið hús hjá okkur á laugardaginn frá kl 14:00-16:00 í hofinu okkar í Öskjuhlíð.
Það er kaffi á könnu og öllum frjálst að mæta.
