Það er okkur sönn ánægja að segja frá því að blaðið, Vor siður er komið út í nýrri mynd. Flestir af okkar félagsmönnum ættu nú þegar að hafa fengið gripinn í hendur. Blaðið verður líka selt fljótlega á nokkrum vel völdum sölustöðum. Jóhanna G. Harðardóttir Kjalnesingagoði ritstýrði blaðinu sem er fullt af fjölbreyttu efni. Stórar og smáar greinar prýða blaðið, viðtöl, frásagnir, sérsmíðuð krossgáta og margt fleira. Myndirnar sem prýða blaðið eru margar og fallegar enda færir ljósmyndarar þar á ferð. Það eru þau Ásgeir Ásgeirsson (Geirix) og Silke Schurack. Um útlit og umbrot sá Gréta Hauksdóttir. Umsjón dagatals var Alda Vala Ásdísardóttir Hvammverjagoði.
Þingblót Ásatrúarfélagsins verður haldið á þórsdag í tíundu viku sumars við Lögberg á Þingvöllum.
Allsherjargoði helgar blótið kl. 18:15 og þegar athöfninni lýkur göngum við saman niður á vellina, grillum og gleðjumst saman.
Félagið mun reisa tjaldborg í skjóli furanna á völlunum eins og áður og félagið sér um að koma grillaðstöðu í gagnið, sem allir gestir geta nýtt sér að vild. Mælt er með að fólk taki með sér mat sem þarf ekki langan eldunartíma því margir þurfa að nota grillin. Börn fá pylsur í boði félagsins og sungið verður saman og spjallað. Allir velkomnir!
Gróðursetning við Þinganes í Heiðmörk 18. júní 2016. Það er komið sumar og gaman að vera úti við að gróðursetja í skógarreit félagsins.
Við hittumst kl. 11:00 við gatnamótin að Elliðaárbænum og förum þaðan saman að reitnum. Trjáplöntur og verkfæri verða á staðnum. Smá hressing verður í boði félagsins.
Margar hendur vinna létt verk.
Allir velkomnir!
Árlegt Mógilsárblót verður haldið laugardaginn 28. mai kl 14:00 við Skógræktarstöðina í landi Mógilsár í Kollafirði.
Alda Vala Ásdísardóttir helgar blótið og síðan verður grillað spjallað og skemmt sér fram eftir degi í fögru umhverfi.
Munið að taka með ykkur eitthvað á grillið og klæða ykkur eftir veðri þótt alltaf sé skjól í skóginum. Allir velkomnir!
Munið siðfræðsluna laugardaginn 30. apríl.
Þetta er síðasti fræðslutíminn þennan vetur, en hann verður helgaður umgengni við landið okkar og útivist og haldinn í Skógræktarstöðinni við Mógilsá.
Mætið með Hávamálin eins og venjulega, en að þessu sinni verður m.a. fjallað um athöfnina sjálfa.
Sigurblót ásatrúarfóks fyrir austan fer fram á sumardaginn fyrsta við Blöndalsbúð í Eyjólfsstaðaskógi og hefst blótið kl. 17:00
Blöndalsbúð opnar kl. 16:00. Heitt verður á könnunni og geta menn tekið með sér nesti. Grillaðar verða Goðapilsur á eldpönnu goðans.
Allir eru hjartanlega velkomnir.
Nánari upplýsingar gefur Baldur í síma 861 2164.
Kveðja Freysgoði
Sumardagsblótið hefst klukkan 14:00 á sumardaginn fyrsta, fimmtudaginn 21. apríl, á flötinni sunnan við lóð Ásatrúarfélagsins í Öskjuhlíð.
Þar verða grillaðar pylsur handa börnunum og þau fá lítinn sumarglaðning. Tóti trúður verður á staðnum kl. 14:00 og um klukkan 15:00 kemur Blaðrarinn og býr til skemmtilega hluti úr blöðrum fyrir börnin.
Allir velkomnir!
Listamaðurinn Snæbjörn Ragnarsson, öðru nafni Bibbi bassaleikari og textasmiður Skálmaldar, mun verða gestur á opnu húsi hér í Síðumúla 15, laugardaginn 2. apríl kl. 14:00.
Bibbi ætlar að sitja fyrir svörum og segja meðal annars frá hugmyndunum bak við hina dýrt kveðnu texta Skálmaldar og viðbrögðunum við tónlist þeirra víða um heim.
Einstakt tækifæri til að kynnast Skálmöld í gegnum einn af listamönnunum. Allir velkomnir meðan húsrúm leyfir.
Goddur mun halda fyrirlestur um svitahof að fornu og nýju á opnu húsi, laugardaginn 19. mars kl. 14:00, að Síðumúla 15. Hann fer í gegnum heimildir og hliðstæðar hefðir um svitahof og tengir þetta saman á nýstárlegan hátt. Síðan mun Goddur svara fyrirspurnum á eftir. Allir eru velkomnir.
Vorjafndægrablót verður haldið föstudaginn 18. mars kl. 18:00 í Einkunnum sem er fólkvangur og útivistarsvæði skammt ofan við Borgarnes. Blótið verður helgað vönum og vættum vorsins og goðmögnum gróandans.
Lyftum horni og fögnum lengri sólargangi og komandi vori!
Til Einkunna liggur 3,5 km vegur af þjóðvegi nr. 1 við hesthúsahverfið ofan við Borgarnes. Upplýsingar hjá Jónínu K. Berg, Þórsnessgoða í síma 865-2581.
Allir velkomnir.