Skip to main content
Flokkur

Fréttir

Goðafundur 20. júní 2007.

Eftir Fréttir

Goðafundur 20. júní 2007

Útdráttur úr fundargerð

1. Þingvallablótið

Umræður og skipulagning blótsins á Þingvöllum þann 21. júní. Önnur mál: Blóthald landshlutagoða á næstunni: Fram kom að samtímis Þingvallablótinu á morgun 21. júní halda þeir sumarsólstöðublót, Eyvindur Vestfirðingagoði vestur á fjörðum og Baldur Freysgoði austur á landi. Haukur Reykjanesgoði hefur áætlað að halda blót í sumar en óvíst hveær. Jónína Vestlendingagoði heldur Vættablót um haustjafndægur þann 22. september.

2. Minningarskjöldur

Umræður um tillögu frá Jóhannesi Levý, um að reistur yrði minningarskjöldur í grafreit Ásatrúarfélagsins í Gufunesi, um ásatrúarmenn sem jarðsettir eru annarsstaðar. Ákveðið var að vísa málinu til Lögréttu. Umræður um goðorð og vinnuframlag goða.

Fundarritari: Jónína K. Berg

Goðafundur 3. mars 2007

Eftir Fréttir

Goðafundur 3. mars 2007

Útdráttur úr fundargerð

1. Verkaskipting goða vegna athafna og hjónavígslna

Fram kom að Tómas mun hafa lausan tíma í sumar og getur því tekið að sér að sjá um hjónavígslur.

2. Gjaldskrá vegna athafna sem framkvæmdar eru af goðum Ásatrúarfélagsins

Umræður um kostnað og vinnuframlag goða. Unnin var gjaldskrá sem liggja skal frammi á skrifstofu félagsins. Til viðmiðunar höfðum við gjaldskrá frá Dómsmálaráðuneytinu um aukaverk presta. Og gjaldskrá sýslumanna vegna hjónavígslna á þeirra vegum. Einnig rætt um hvort félagið kæmi til móts, með að taka þátt í kostnaði vegna siðfræðslu.

3. Kynningarmál

Umræður um siðfestu og að betur þurfi að kynna siðfræðsluna á heimasíðunni. Rætt um að goðar í landshlutum auglýsi skráningu til siðfræðslu hver á sínu landssvæði og hvort félagið komi á móts við auglýsingakostnað.

Fundarritari Jónína K. Berg

Goðafundur 2. febrúar 2007

Eftir Fréttir

Goðafundur 2. febrúar 2007

Fundur settur kl 18:10

1. Áætlun um næstu goðafundi

Ákveðið var að næsti fundur yrði haldinn þann 3. mars á undan lögréttufundi og að þar næsti goðafundur yrði haldinn í Hlésey hjá Kjalnesingagoða í byrjun apríl.

2. Áætlað hvenær ársins hver goði muni standa fyrir blótum

Baldur áætlar að halda blót sumardaginn fyrsta þann 19. apríl á Austurlandi.
Jóhanna heldur blót 19. maí á Mógilsá.
Eyvindur áætlar blót í júní eða júlí á Vestfjörðum og Jóhanna mun halda blót að Hlésey í Hvalfirði seinnipart sumars.
Jónína verður með blót á Vesturlandi um haustjafndægur þann 22. september.

3. Verkaskipting goða vegna athafna

Vegna mikillar aukningar í fjölda athafna, sérstaklega hjónavígslna yfir sumartímann munu þeir goðar sem nýlega hafa fengið vígsluréttindi taka að sér fleiri hjónavígslur næsta sumar, skipulag varðandi þetta verður gert á næstunni.

Einnig verður gerður listi sem liggja mun frammi í Síðumúla um þær athafnir sem hver goði er tilbúinn að taka að sér.

4. Fyrirspurn frá laganefnd varðandi fyrirkomulag við Þingvallablót og varðandi gjaldtöku vegna athafna

Jónína leggur til að aftur verði tekin upp sú venja að taka fyrir og afgreiða eina ályktun eða eitt mál sem samstaða er um, á blótum á Þingvöllum.

Munum kanna fyrirkomulag hjá öðrum trúfélögum og fá nánari upplýsingar frá Hagstofunni varðandi gjaldtöku fyrir athafnir. Leggjum áherslu á að félagið starfi á landsvísu og stuðlað sé að jafnræði, hvar á landinu sem halda þarf athöfn og leggjum til að félagið standi straum af hluta kostnaðar við athafnir og ferðir goða.

5. Kynningarmál vegna siðfestu

Umræður um að félagið þurfi að minna á siðfestuathafnir og þá fræðslu sem því tilheyrir. Goðar leggja til að stjórn auglýsi skráningu til siðfestu í fjölmiðlum á næstunni og að tilkynningin birtist einnig á vefsíðu félagsins (það mætti koma fram í auglýsingunni). Jóhanna leggur til að á Þingvallablótinu fari þau sem það velja í gegnum siðfestuna.

Önnur mál

Umræður um áhrif áfalla af ýmsum orsökum svo sem vegna slysa og dauðsfalla. Baldur lagði fram samantekt og lesefni varðandi þessi mál.

Fundarritari Jónína K. Berg

Dagskrá hausts/vetrar hafin!

Eftir Fréttir

Kæru meðlimir og aðrir forvitnir.

Þá er dagskráin okkar hafin og verða eftirfarandi viðburðir í gangi í haust/vetur;

Handverkskvöld; hugsuð fyrir þá sem hafa áhuga á handverki. Tilvalið að taka með sér það verkefni sem hver og ein/nn er með í vinnslu og deila reynslu með öðrum. Öll þriðjudagskvöld kl 20:00.

Leshópur; Í leshópnum ætlum við að ræða valin verk og kvæði. Boðið er upp á kaffi og meðlæti og öll eru velkomin. Í haust/vetur ætlum við að byrja á að grúska í Hávamálum. Öll miðvikudagskvöld kl 20:00.

Opið hús; Boðið er upp á kaffi og með því yfir léttu spjalli. Öðru hverju eru skemmtilegir og fróðlegir fyrirlestrar og þá verða þeir auglýstir sérstaklega hér á vefsíðunni og á facebooksíðu félagsins. Alla laugardaga frá kl 14-16.

Jafndægrablót

Eftir Fréttir

Sunnudaginn 25. september klukkan 16:00 verður haldið jafndægrablót í Selsskógi í Skorradal. Fögnum árstíðunum og lyftum horni til heilla goðum og góðum vættum. Kakó á eftir og öll velkomin.

Kær kveðja, Vestlendingagoði.

Opinn lögréttufundur 17. september kl 14:30

Eftir Fréttir

Opinn lögréttufundur Ásatrúarfélagsins verður haldinn, laugardaginn 17. september, kl. 14:30, í hofi félagsins í Öskjuhlíð að Menntasveig 15. Áætluð fundarlok 15:30 til 16:00.

Félagsmenn Ásatrúarfélagsins velkomnir.

Mál á dagskrá:
1. Öryggisúttekt. Til kynningar.
2. Ásatrúarfélagið – Almenningsheillafélag. Til kynningar.
3. Afmælisár – Ásatrúarfélagið 50 ára um þessar mundir. Félagið var stofnað 20. apríl 1972 og fékk löggildingu ári eftir stofnun.
4. Hofbyggingin. Áframhald framkvæmda.
Magnús Jensson arkitekt segir frá sinni framtíðarsýn á áframhaldandi byggingu hofsins og áfangaskiptingu. Verklegi þátturinn.
5. Önnur mál.